Oriental Daily I B04 I  2016-09-27

絲絲講場:4萬變2630萬北角舖真誇!

北角區老街坊向來唔少,好多做街坊客嘅老舖,原來都有好多年歷史。有位長情舖位業主最近就賣咗佢揸住56年嘅七姊妹道舖位畀投資者盛匯商舖基金管理,當日賣4萬幾蚊嘅舖位,今日竟然值2,630萬,升值超過603倍,真係「十年爛銅變黃金」。

北角舖位大幅升值。

餅店恐加租至10萬

絲絲為此專登去北角走一轉,去到先知,原來就係絲絲讀U時,放學不時經過嗰間康甜餅店所在。呢間麵包舖大大話話喺度廿幾年,依家新業主話明,現時租金低於市值,仲話兩年之後睇租金可以去到10萬喎,咁即係差唔多係依家嘅一倍。

絲絲同康甜餅店老闆王先生傾過偈,佢話暫未聽聞業主賣舖嘅消息,但對此就感到突然,「個幾月前先同業主傾過電話,但唔聽佢講過(賣舖)。」

新業主盛匯商舖基金管理創辦人李根興。

「上手業主已加5成」

目前餅店租約期至一八年三月,未有人同佢商議新租約,佢亦未決定會唔會繼續經營,要視乎租金加幅而定。王先生係餅店第二代繼承人,多年來都係做街坊生意,近年即使經營困難都無將成本轉嫁畀街坊。

佢又話,對上一次舊業主其實已經加咗50%,現時租金成本佔比達四成,食材、人工又愈嚟愈貴,經營得好辛苦。如果新業主再要求大幅加租,或考慮附近另覓舖位,繼續為街坊提供新鮮出爐麵包。「街坊一向都好捧場,因為佢哋明白我哋啲細舖頭一定無落防腐劑!」嗱,呢啲咪係人情味囉,不過呢份20載嘅人情味,可唔可以延續落去真係難講。