on.cc東網: m18講場:「兄弟檔」搞眾籌吸金2億
2016/06/15  19:05
【on.cc東網專訊】 人脈值千金,工作上有一兩個朋友帶契已經順心唔少,如果有幾百個「貴人」相助,成事真係易過借火!前排四季酒店有個投資介紹會,500幾人出席,包括退休人士、前賓架、上市公司高層,佢地有個共同點,荷包都好疊水,拎一、兩百萬出嚟試下投資新嘢,都只算係「小試牛刀」,呢種朋友真係交得過。

夠分量邀請呢班投資者出席聚會嘅,係康業信貸快遞行政總裁李根泰(Steven),同埋佢做開基金嘅細佬盛滙創辦人兼行政總裁李根興(Edwin)。兩兄弟拍住上一齊搞眾籌,成功由一班親朋戚友、叔伯兄弟手上吸金2億元。兩兄弟出嚟同傳媒報喜,配合番眾籌潮look同公司logo,一個着橙色西裝,一個着綠色西裝,非常醒神。Edwin話,過去3個月成功籌得2億,過多幾個月等生意做大之後,佢再籌多啲都唔係問題!